Les trois miracles de Sainte Cécile Aita Donostiaren obra berezienetako bat da. 1920an konposatua eta 1921ean Parisen estreinatua, Henri Ghéon idazle eta antzerkigile frantsesarekin egin zuen lehen lankidetzatik sortu zen.

Jatorriz hari-orkestra, pianoa, organoa, harpa eta emakumezkoen abesbatzarako idatzia, obrak tinbre-aberastasun handia eta eragin frantses nabarmena duen hizkuntza harmonikoa uztartzen ditu. Sei mugimenduetan zehar, Donostiak modernitatea, espiritualtasuna eta tradizioa elkartzen dituen soinu-unibertso bat sortzen du, In paradisum melodia gregorianoa ere txertatuz.

Edizio honek obra lehen aldiz jartzen du interpreteen, ikertzaileen eta konpositorearen alderdi bereziki berritzailea berraurkitu nahi duen publikoaren eskura.