Ravel | Donostia: Adiskidetasunaren oihartzunak

Aita Donostia Jaialdiak bere 3. edizioa ospatzen du oroitzapen historiko batekin: Maurice Ravel (1875–1937) konpositorearen jaiotzaren 150. urteurrena. Jaialdiak 2025eko egitaraua eskaintzen du konpositore handia eta euskal musikaren funtsezko figura bat, Aita Donostia (José Gonzalo Zulaica, 1886–1956), elkartzen dituen harreman pertsonal eta artistiko sakona aztertzeko. Bi musikariek adiskidetasun eta elkarrekiko estimu harremana partekatu zuten, eta horrek programa berezi eta hunkigarria inspiratzen du.

Gure helburua lotura kultural eta gizatiar hau balioan jartzea da, bi maisuen lanen eta haien testuinguru partekatuen inguruan antolatutako errepertorioaren bidez. Egitarauak Aita Donostiaren lanen hautaketa esanguratsua biltzen du, bere ondarearen gaurkotasuna eta sakontasuna erakusten dituzten hainbat estreinaldi absoluturekin. Horiez gain, Maurice Ravelen obra adierazgarriak eta, halaber, bien inguruko garaikide frantsesen konposizioak aurkezten dira, besteak beste Lili Boulanger eta Francis Poulenc-enak. Beren inguruko euskal konpositoreen lanak ere txertatzen ditugu, ekitaldiaren ikuspegi kulturala aberastuz.

Aurtengo edizioak maila goreneko kontzertu sorta eskaintzen du, nazioarteko ospe handiko artistekin. Biola eta piano errezitaldian, biola-jotzaile Razvan Popovici eta pianista Josu Okiñena izango ditugu. Biolin, biolontxelo eta pianoarentzako trio programan, biolinista Tatiana Samouil, biolontxelista Pavel Gomziakov eta, berriro ere, pianista Josu Okiñena arituko dira.

Gainera, KEA abesbatzak kontzertu koral zirraragarria eskainiko du, Ravelen Trois chansons eta Aita Donostiaren hiru estreinaldi absolutu barne: Lo leri lo, Belenen sortu zaigu eta Salmo Voce Mea, Enrique Azurza zuzendariaren gidaritzapean.

Itxiera kontzerturako, kamera-talde apartekoa aurkezten dugu: klarinete-jotzaile Isaac Rodríguez, biola-jotzaile Natalia Tchitch eta pianista Josu Okiñena osatutako hirukotea.

Gonbidatzen zaituztegu musika-topaketa berezi honetan parte hartzera; gure soinu-historiako bi figura giltzarri omendu eta elkarrizketan jartzen dituen omenaldia da.

Lagundu iezaguzu karbono-aztarna murrizten: Zatoz garraio publikoan, bizikletaz edo oinez. Kontzertu bakoitzaren sarbide-orrian informazio baliagarria aurkituko duzu. Gainera, zure programa QR kodearekin deskarga dezakezu: paper gutxiago, jasangarritasun handiagoa.